June 28, 2026
અલ નીનોના કારણે ખેડૂતો હજુ પણ મેઘરાજા ના આગમન ની રાહ જોઈ રહ્યા છે. એવું લાગે છે કે આ વખતે મેઘરાજા ગુસ્સે છે. રાજ્યમાં પુષ્કળ વાદળો છે, પરંતુ હજુ પણ વરસાદ નથી આવી રહ્યો. રાજ્યમાં ચોમાસાના પ્રવેશ પછી પણ મોટાભાગના જિલ્લાઓ હજુ પણ સૂકા છે. ત્યારે અંબાલાલ પટેલે પોતાની આગાહીમાં કહ્યું છે કે રાજ્યમાં સાર્વત્રિક વરસાદ ક્યારે નોંધાશે.
રાજ્યમાં વર્તમાન સ્થિતિ અને વરસાદની આગાહી
હાલમાં, ગુજરાતમાં ચક્રવાતી પરિભ્રમણ સક્રિય છે અને એક ટ્રફ પસાર થવાને કારણે, વરસાદી વાતાવરણ ચાલુ રહેશે. આજે, કચ્છ, બનાસકાંઠા, સાબરકાંઠા, દાહોદ અને છોટા ઉદેપુર જેવા વિસ્તારોમાં વરસાદની શક્યતા છે. સુરત, ડાંગ, તાપી, વલસાડ, નવસારી અને દમણ-દાદરા નગર હવેલીમાં વરસાદી વાતાવરણ ચાલુ રહેશે.
આગામી સમયમાં ૪૦ થી ૬૦ કિમી પ્રતિ કલાકની ઝડપે પવન ફૂંકાય તેવી શક્યતા છે, આને ધ્યાનમાં રાખીને, માછીમારોને ૧ જુલાઈએ દરિયામાં ન જવાની સલાહ આપવામાં આવી છે. ૨ અને ૩ જુલાઈએ સમગ્ર રાજ્યમાં સામાન્ય વરસાદની આગાહી કરવામાં આવી છે.
હવામાન નિષ્ણાત અંબાલાલ પટેલ દ્વારા મહત્વપૂર્ણ આગાહી
હવામાન નિષ્ણાત અંબાલાલ પટેલના જણાવ્યા મુજબ, હાલમાં દરિયામાં કોઈ મોટી સિસ્ટમ સક્રિય ન હોવાને કારણે ચોમાસામાં થોડો વિલંબ થયો છે. પરંતુ હવે પરિસ્થિતિ બદલાઈ રહી છે. આ સમયગાળા દરમિયાન ગુજરાતમાં સામાન્ય વરસાદની પ્રબળ શક્યતા છે. ૨૮ કે ૨૯ જૂન દરમિયાન બંગાળની ખાડીમાં હળવું હવાનું દબાણ બનવાની શક્યતા છે, જે સિસ્ટમ સક્રિય થવાને કારણે ગુજરાતમાં વાદળછાયું બનશે. આ સમયગાળા દરમિયાન, દક્ષિણ ગુજરાતમાં ભારે વરસાદ અને કેટલાક ભાગોમાં પૂર જેવી સ્થિતિની શક્યતા છે. આ સમય દરમિયાન સૌરાષ્ટ્ર, મધ્ય ગુજરાત અને ઉત્તર ગુજરાતના તમામ ઝોનમાં પણ સારો વરસાદ પડશે.
Trending News
આગામી વરસાદનો રાઉન્ડ
અંબાલાલ પટેલ દ્વારા લાંબા ગાળાની આગાહી પણ કરવામાં આવી છે. ૧૬ જુલાઈની આસપાસ વરસાદનો બીજો રાઉન્ડ આવવાની શક્યતા છે, જેના કારણે નર્મદા નદીનું જળસ્તર વધવાની શક્યતા છે. ૨ ઓગસ્ટની આસપાસ રાજ્યમાં ફરી એકવાર વ્યાપક વરસાદ પડવાની શક્યતા છે, જેના કારણે તાપી નદીનું જળસ્તર પણ વધી શકે છે.
હવામાન વિભાગની સૂચનાઓનું પાલન કરવું અને ખાસ કરીને દરિયાકાંઠાના વિસ્તારોમાં સાવચેતી રાખવી હિતાવહ છે. ખેડૂતો અને નાગરિકોને આગામી દિવસોમાં વરસાદના આ રાઉન્ડ માટે તૈયાર રહેવાની સલાહ આપવામાં આવે છે.