June 22, 2026
ગુજરાતમાં ફરી એકવાર મેઘરાજાએ મોટી એન્ટ્રી કરી છે. અમરેલી, ભાવનગર, વડોદરા, નર્મદા અને વલસાડ સહિતના જિલ્લાઓમાં સારો વરસાદ પડી રહ્યો હોવાથી લોકો અને ખેડૂતોમાં ખુશીની લહેર જોવા મળી રહી છે. છેલ્લા કેટલાક દિવસોથી અસહ્ય ગરમી અને ભેજથી પરેશાન લોકોને આ વરસાદથી મોટી રાહત મળી છે. વાતાવરણમાં અચાનક ઠંડક આવવાથી લોકોએ રાહત અનુભવી છે, તો બીજી તરફ, આ વરસાદ અગાઉથી વાવણી કરનારા ખેડૂતો માટે પણ આશીર્વાદરૂપ સાબિત થયો છે.
અમરેલી જિલ્લામાં સતત પાંચમા દિવસે મેઘરાજા મહેરબાન રહ્યા છે. સાવરકુંડલા શહેર અને તેના ગ્રામ્ય વિસ્તારોમાં સારો વરસાદ શરૂ થયો છે. ખાસ કરીને વિજપડી, ખડસાલી, નવાગામ અને છાપરી સહિતના ગામોમાં ભારે વરસાદ પડ્યો છે. વિજપડી ગામમાં એટલો બધો વરસાદ પડ્યો કે રસ્તાઓ પાણીથી ભરાઈ ગયા. સતત પાંચમા દિવસે પણ વરસાદ ચાલુ રહેતાં સાવરકુંડલા પંથકના ખેડૂતો ખૂબ ખુશ છે. અગાઉથી વાવણી કરનારા ખેડૂતોને આ વરસાદથી મોટો ફાયદો થવાની શક્યતા છે.
ભાવનગરમાં વરસાદની એન્ટ્રી
ભાવનગરમાં પણ બપોર પછી વાતાવરણમાં અચાનક પલટો આવ્યો અને વરસાદે એન્ટ્રી કરી. શહેરના વિવિધ વિસ્તારોમાં જેમ કે કાળીયાબીડ, કલાનાળા, પાનવાડી અને સરદારનગર વિસ્તારમાં વરસાદ શરૂ થતાં લોકોને રાહત મળી. ભાવનાના લોકો ઘણા સમયથી વરસાદની આતુરતાથી રાહ જોઈ રહ્યા હતા. શહેરમાં વ્યાપક વરસાદને કારણે લોકોને અસહ્ય ગરમી અને વાવાઝોડામાંથી મોટી રાહત મળી છે અને વાતાવરણ ઠંડુ થતાં શહેરીજનો ખુશ છે.
Trending News
વડોદરાના શિનોરમાં વરસાદી વાતાવરણ
હવામાન વિભાગની આગાહી મુજબ, વડોદરા જિલ્લાના શિનોર પંથકના ગામડાઓમાં પણ વરસાદી ઝાપટા શરૂ થયા છે. શિનોરના સાધલી સહિતના ગ્રામીણ વિસ્તારોમાં હળવો અને ભારે વરસાદ પડ્યો છે. શિનોર પંથકના લોકો દિવસભર તીવ્ર ગરમી અને પવનથી પીડાતા હતા, પરંતુ આ વરસાદથી મોટી રાહત મળી છે. વરસાદ શરૂ થતાં જ ખેડૂતોમાં પણ ખુશીની લાગણી જોવા મળી છે.
નર્મદાના સાગબારામાં કરા પડયા
નર્મદા જિલ્લાના સાગબારા તાલુકા અને તેની આસપાસના ગ્રામીણ પરગણામાં હવામાનમાં પલટો આવ્યો છે. અહીં-ત્યાં ઝરમર વરસાદ પડ્યો છે, જ્યારે સાગબારાના કેટલાક ગ્રામીણ વિસ્તારોમાં કરા પણ પડ્યા છે. ચોપડવાવ, ધનશેરા અને સેલંબા સહિતના ગામોમાં છૂટાછવાયા ઝરમર વરસાદ પડ્યો છે. વરસાદ શરૂ થતાં વાતાવરણ ઠંડુ થઈ ગયું છે અને ખેડૂતોમાં ખુશીની લહેર ફેલાઈ ગઈ છે.
વલસાડના કપરાડામાં ખુશનુમા હવામાન
રાજ્યના ‘ચેરાપુંજી’ તરીકે ઓળખાતા વલસાડના કપરાડા તાલુકામાં વહેલી સવારથી જ વરસાદી વાતાવરણ જોવા મળી રહ્યું છે. કપરાડા અને શૈલધા પંથકના ગામો તેમજ સુથારપાડા અને તેની આસપાસના વિસ્તારોમાં વરસાદ પડ્યો છે. પહાડી વિસ્તારોમાં વરસાદથી હવામાન એકદમ ખુશનુમા અને ઠંડુ થઈ ગયું છે. સારા વરસાદને કારણે અહીંના ખેડૂતો પણ ખુશ થઈ ગયા છે.