June 17, 2026
સામાન્ય રીતે ૧૫ જૂન સુધીમાં ગુજરાતમાં ચોમાસુ આવી જાય છે અને ૩૦ જૂન સુધીમાં સમગ્ર રાજ્ય વરસાદથી ઘેરાઈ જાય છે, પરંતુ આ વર્ષે ૧૫ જૂન પસાર થઈ ગયો હોવા છતાં, ચોમાસુ હજુ સુધી રાજ્યમાં સત્તાવાર રીતે પ્રવેશ્યું નથી, જેના કારણે ચિંતા વધી ગઈ છે. હવામાન એજન્સી સ્કાયમેટના જણાવ્યા અનુસાર, ૮ જૂનથી પશ્ચિમ કિનારા પર ચોમાસુ સ્થિર છે, જેના કારણે મુંબઈ પહોંચવામાં હજુ ૭ થી ૮ દિવસ લાગી શકે છે. જોકે, આ સમય દરમિયાન, દરિયાકાંઠાના ગુજરાત અને કેટલાક અન્ય વિસ્તારોમાં પ્રી-મોન્સૂન એક્ટિવિટીના ભાગ રૂપે હળવો વરસાદ ચાલુ રહેશે.
હવામાન વિભાગના ડિરેક્ટર એ. કે. દાસના જણાવ્યા અનુસાર, આગામી ૭ દિવસ સુધી ગુજરાત, દીવ, દમણ અને દાદરા નગર હવેલીમાં ભારે વરસાદની કોઈ મોટી ચેતવણી નથી, પરંતુ કેટલાક વિસ્તારોમાં હળવો થી મધ્યમ વરસાદ પડી શકે છે. આજે, ૧૭ જૂને, ઉત્તર ગુજરાતના ગીર સોમનાથ, અમરેલી, ભાવનગર, ભરૂચ, સુરત, તાપી, નવસારી, વલસાડ, ડાંગ, દમણ, દાદરા અને નગર હવેલી તેમજ બનાસકાંઠા, સાબરકાંઠા અને અરવલ્લીમાં ગાજવીજ સાથે હળવો વરસાદ પડવાની શક્યતા છે. જ્યારે આવતીકાલે, ૧૮ જૂને, અરવલ્લી, મહિસાગર અને દાહોદ જિલ્લાના છૂટાછવાયા વિસ્તારોમાં વરસાદી વાતાવરણ રહેશે અને બાકીના જિલ્લાઓમાં હવામાન શુષ્ક રહેશે.
જો છેલ્લા બે વર્ષના આંકડા જોઈએ તો, ૨૦૨૫માં ચોમાસું ૧૬ જૂને પ્રવેશ્યું હતું, જ્યારે ૨૦૨૪માં ૩ દિવસ વહેલું એટલે કે ૧૨ જૂને પહોંચ્યું હતું. આ વર્ષે ચોમાસામાં વિલંબ માટે ‘અલ નિનો’ જવાબદાર માનવામાં આવી રહ્યું છે. હવામાન વિભાગ (IMD) ની લાંબા ગાળાની આગાહી મુજબ, આ વખતે સામાન્ય કરતાં ઓછો વરસાદ પડવાની શક્યતા છે કારણ કે અલ નિનો સ્થિતિ વધુ મજબૂત બની રહી છે.
દેશના અન્ય રાજ્યોની વાત કરીએ તો, તેલંગાણા, ઓડિશા, ઝારખંડ, બિહાર અને છત્તીસગઢ તરફ ચોમાસાને આગળ વધારવા માટે પરિસ્થિતિઓ ખૂબ અનુકૂળ છે. જોકે, ગુજરાતમાં હાલમાં દક્ષિણ-પશ્ચિમ દિશાના પવનો નીચા સ્તરે ફૂંકાઈ રહ્યા છે. છેલ્લા 24 કલાકમાં, રાજ્યમાં હવામાન મોટાભાગે શુષ્ક રહ્યું છે અને તાપમાનમાં કોઈ મોટો ફેરફાર થયો નથી. આગામી 7 દિવસ સુધી તાપમાન સમાન રહેવાની ધારણા છે.
Trending News
આ આગાહી વચ્ચે, 17 જૂનની સવારે નવસારી શહેરના હવામાનમાં અચાનક ફેરફાર થયો હતો. શહેરના પૂર્વીય વિસ્તારો જેમ કે સર્કિટ હાઉસ અને ડેપા, આસપાસના વિસ્તારોમાં પવન સાથે વરસાદ પડ્યો હતો. આ ઝાપટાને કારણે ગરમીથી પરેશાન લોકોને થોડી રાહત મળી અને વાતાવરણ ઠંડુ થઈ ગયું છે. દક્ષિણ ગુજરાતના ખેડૂતો અને સામાન્ય નાગરિકો હાલમાં વાવણી માટે યોગ્ય સારા ચોમાસાના વરસાદની આતુરતાથી રાહ જોઈ રહ્યા છે.