તમારું મોબાઇલ ચાર્જર પણ બદલી જશે! સરકાર લાવી રહી છે નવો નિયમ, જાણો ક્યારે લાગૂ થશે?

કેન્દ્ર સરકાર મોબાઈલ ચાર્જિંગના નિયમોમાં ફેરફાર કરવા જઈ રહી છે. સરકારના આવા ફેરફારોની સીધી અસર મોબાઈલ યુઝર્સ પર પડશે. તેમજ સરકારના નવા નિયમોની અસર સૌથી વધુ સ્માર્ટફોન મેન્યુફેક્ચરિંગ કંપનીઓ પર જોવા મળશે. રિપોર્ટ અનુસાર કેન્દ્ર સરકાર કોમન ચાર્જિંગ નિયમ લાગુ કરવા જઈ રહી છે. આ કારણે એક દેશમાં માત્ર એક જ પ્રકારનું ચાર્જર વેચવામાં આવશે. આવી સ્થિતિમાં લેપટોપ, ટેબલેટ અને મોબાઈલ ફોન માટે અલગ ચાર્જરની જરૂર રહેશે નહીં.

રિપોર્ટ અનુસાર સરકાર ટાઇપ-સી ચાર્જરને સ્ટાન્ડર્ડ ચાર્જર માની શકે છે. આવી સ્થિતિમાં દેશમાં વેચાતા સ્માર્ટફોન, ટેબલેટ અને સ્માર્ટ ઘડિયાળો જેવા તમામ પ્રકારના ઇલેક્ટ્રોનિક ઉપકરણોમાં ટાઇપ સી ચાર્જિંગ પોર્ટ પ્રદાન કરી શકાય છે. સરકાર ટાઇપ સી ચાર્જિંગને ફરજિયાત બનાવી શકે છે. તમને જણાવી દઈએ કે ભારત પહેલા યુરોપિયન યુનિયન દ્વારા ટાઇપ સી ચાર્જિંગ ફરજિયાત કરવામાં આવ્યું છે. આ નિયમ યુરોપિયન યુનિયન દ્વારા વર્ષ 2022માં લાગુ કરવામાં આવ્યો હતો. જો કે ભારતમાં આવો નિયમ અસ્તિત્વમાં નથી. જો કે, આ વર્ષના અંત સુધીમાં કોમન ટાઈપ સી ચાર્જિંગનો નિયમ ફરજિયાત બની શકે છે.

તમામ મોબાઈલ ફોન યુઝર્સને આનો ફાયદો થશે, કારણ કે તેમને અલગ-અલગ ડિવાઈસ માટે અલગ ચાર્જર શોધવાની જરૂર નહીં પડે. ઉપરાંત નવો નિયમ પર્યાવરણના દૃષ્ટિકોણથી ફાયદાકારક રહેશે. ટાઈપ સી ચાર્જિંગને ફરજિયાત બનાવવાથી ઈ-વેસ્ટમાં વધારો થતો અટકશે. મોબાઈલ યુઝર્સને ઓછા ચાર્જરની જરૂર પડશે. આવી સ્થિતિમાં મોબાઈલ યુઝરના પૈસા બચશે.