ગુજરાતમાં ચોમાસું આવ્યું પણ હજુ રાહ જોવી પડશે ! જાણો હવામાન વિભાગની સામાન્યથી ભારે વરસાદની આગાહી

આજે સવારથી દક્ષિણ ગુજરાતના સુરત અને નવસારીમાં વરસાદ પડી રહ્યો છે. ત્યારે હવામાન વિભાગે ગુજરાતના હવામાન માટે સાત દિવસની આગાહી કરી છે. જેમાં આજે ભારે વરસાદની સાથે અનેક વિસ્તારોમાં સામાન્ય વરસાદની આગાહી કરવામાં આવી છે. આ સાથે ગુજરાતના તાપમાન વિશે પણ માહિતી આપવામાં આવી છે.

હવામાન વિભાગના અમદાવાદ કેન્દ્રના હવામાન વૈજ્ઞાનિક રામાશ્રય યાદવના જણાવ્યા અનુસાર ઉત્તર પૂર્વ અરબી સમુદ્ર અને સૌરાષ્ટ્ર નજીક એક ચક્રવાતી પરિભ્રમણ રચાયું છે. તો આજે નવસારી, સુરત, વલસાડ, દમણ અને દાદરા નગર હવેલીમાં ભારે વરસાદની આગાહી કરવામાં આવી છે. આ સાથે સૌરાષ્ટ્રના ગીર સોમનાથ, અમરેલી, ભાવનગરમાં પણ ભારે વરસાદની આગાહી કરવામાં આવી છે. આ સાથે ગાજવીજની ચેતવણી પણ આપવામાં આવી છે.

ભારે વરસાદની સાથે કેટલાક વિસ્તારોમાં ગાજવીજ સાથે હળવાથી મધ્યમ વરસાદની પણ આગાહી છે. જેમાં દક્ષિણ ગુજરાતના તમામ જિલ્લાઓનો સમાવેશ થાય છે. આ સાથે ઉત્તર ગુજરાતના અરવલ્લી, ખેડા, આણંદ, પંચમહાલ, દાહોદ અને મહિસાગરમાં પણ છૂટાછવાયા સ્થળોએ હળવાથી મધ્યમ વરસાદની આગાહી કરવામાં આવી છે.

હવામાન વિભાગે આજની આગાહીમાં જણાવ્યું છે કે આવતીકાલથી શનિવાર સુધી છૂટાછવાયા સ્થળોએ ગાજવીજ સાથે હળવાથી મધ્યમ વરસાદની સંભાવના છે. ગાંધીનગર, આણંદ, પંચમહાલ, દાહોદ, મહિસાગર, દક્ષિણ ગુજરાતના તમામ જિલ્લાઓનો સમાવેશ થાય છે.