July 21, 2026
ગુજરાતમાં ફરી વરસાદી વાતાવરણ શરૂ થયું છે. રાજ્યમાં અપર એર સાયક્લોનિક સિસ્ટમ સક્રિય થઈ હોવાથી, દક્ષિણ ગુજરાત અને ઉત્તર ગુજરાતના વિવિધ ભાગોમાં તેની અસરો જોવા મળશે. આગામી સાત દિવસ સુધી હળવાથી મધ્યમ વરસાદની આગાહી કરવામાં આવી છે. હવામાન વિભાગની આગાહી મુજબ, સુરત, ડાંગ, તાપી અને નવસારીમાં ભારે વરસાદ પડી શકે છે.
હવામાન વિભાગે આજે ગાજવીજ સાથે મધ્યમ વરસાદનું એલર્ટ જારી કર્યું છે. હવામાન વિભાગની આગાહી મુજબ, દાહોદ, છોટા ઉદેપુર, નર્મદા, નવસારી, વડોદરા, ભરૂચ, સુરત, વલસાડ, ભાવનગર, અમરેલી, બોટાદ, અમદાવાદ તેમજ દમણ અને દાદરા નગર હવેલીમાં આજે વરસાદનું ઓરેન્જ એલર્ટ જારી કરવામાં આવ્યું છે. જ્યારે આ વિસ્તારોમાં 40 કિલોમીટર પ્રતિ કલાકની ઝડપે પવન ફૂંકાય છે અને 5 થી 15 મિલીમીટર વરસાદ પડવાની શક્યતા છે.
હવામાન વિભાગે જૂનાગઢ, ગીર સોમનાથ, રાજકોટ, સુરેન્દ્રનગર, ગાંધીનગર, પોરબંદર, આણંદ અને ખેડા, પંચમહાલ, મહિસાગર, અરવલ્લી, સાબરકાંઠા, તાપી, ડાંગ અને દીવમાં વરસાદ માટે યલો એલર્ટ જારી કર્યું છે. આ વિસ્તારોમાં ગાજવીજ સાથે હળવો વરસાદ થવાની આગાહી કરવામાં આવી છે. હવામાનમાં અચાનક થયેલા આ ફેરફારને પગલે તંત્રએ નાગરિકોને જરૂરી સાવચેતી રાખવા અને સલામત સ્થળોએ રહેવાની સૂચના પણ આપી છે.
બીજી તરફ, હવામાન નિષ્ણાત અંબાલાલ પટેલે આગાહી કરી છે. અંબાલાલ પટેલના જણાવ્યા અનુસાર, રાજ્યમાં ફરીથી મેઘરાજા બેટિંગ કરવા માટે તૈયાર છે. 22 જુલાઈથી ગુજરાતમાં એક મજબૂત વરસાદી સિસ્ટમ સક્રિય થશે. જેના કારણે ઉત્તર ગુજરાતથી દક્ષિણ ગુજરાત સુધી ભારેથી અતિ ભારે વરસાદની શક્યતા વ્યક્ત કરવામાં આવી છે. અરવલ્લી, પંચમહાલ, દાહોદ, છોટા ઉદેપુર, કચ્છ અને સૌરાષ્ટ્રના ઘણા વિસ્તારોમાં ભારે વરસાદની શક્યતા છે. જો સિસ્ટમ મજબૂત બને તો 5 થી 6 ઇંચ વરસાદ પડી શકે છે. ૨૪ થી ૨૭ જુલાઈ દરમિયાન દક્ષિણ ગુજરાતમાં ૮ થી ૧૦ ઇંચ વરસાદ પડી શકે છે.
Trending News
અંબાલાલ પટેલે પશ્ચિમ સૌરાષ્ટ્રના દ્વારકા અને પોરબંદરમાં ૩ ઇંચથી વધુ વરસાદની આગાહી કરી છે. જ્યારે જામનગર, રાજકોટ, સુરેન્દ્રનગર અને મોરબીમાં પણ હળવો થી ભારે વરસાદ પડી શકે છે. દેવભૂમિ દ્વારકા અને ગીર સોમનાથમાં ૪ ઇંચ વરસાદની શક્યતા છે. ૨૪ થી ૨૭ જુલાઈ દરમિયાન દક્ષિણ ગુજરાતમાં અતિ ભારે વરસાદની ચેતવણી જારી કરવામાં આવી છે. અતિ ભારે વરસાદને કારણે નાની નદીઓમાં પૂર જેવી સ્થિતિની શક્યતા છે. આ સાથે ઓગસ્ટ મહિનામાં પણ સારા વરસાદની આગાહી કરવામાં આવી છે.