June 10, 2026
૧૬ રાજ્યોમાં ચોમાસાએ જોરદાર એન્ટ્રી કરી છે, ત્યારે ગુજરાતમાં પણ મેઘરાજાએ દસ્તક આપી છે. હવામાન વિભાગે આગામી ૭ દિવસ રાજ્યમાં, ખાસ કરીને દક્ષિણ ગુજરાત અને સૌરાષ્ટ્રમાં હળવાથી મધ્યમ વરસાદની આગાહી કરી છે. આગાહી વચ્ચે, વલસાડના ઉમરગામમાં પવન સાથે ભારે વરસાદને કારણે રસ્તાઓ પર પાણી વહી ગયા છે અને લોકોને કાળઝાળ ગરમી અને આંધીથી મોટી રાહત મળી છે.
હવામાન વિભાગના જણાવ્યા અનુસાર, આજે દક્ષિણ ગુજરાત સહિત કેન્દ્રશાસિત પ્રદેશ દમણ અને દાદરા નગર હવેલીમાં વરસાદ પડી શકે છે. આગામી દિવસોની વાત કરીએ તો, ૧૧ અને ૧૨ જૂને દક્ષિણ ગુજરાતના સુરત, તાપી, ડાંગ, નવસારી અને વલસાડ જિલ્લાના છૂટાછવાયા વિસ્તારોમાં હળવાથી મધ્યમ વરસાદની ઉચ્ચ સંભાવના છે. આ સાથે, દમણ અને દાદરા નગર હવેલીમાં પણ વરસાદી વાતાવરણ ચાલુ રહેશે.