સાયક્લોનિક સર્ક્યુલેશન સક્રિય થતાં આજે સૌરાષ્ટ્ર અને દક્ષિણ ગુજરાતનાં ચાર જિલ્લામાં અતિભારે વરસાદની આગાહી

ગુજરાતમાં ચોમાસાની વિદાય વચ્ચે વરસાદે ફરી જોર પકડ્યું છે. મધ્ય મહારાષ્ટ્રમાં સાયક્લોનિક સર્ક્યુલેશન સક્રિય થતાં ગુજરાતમાં આગામી ત્રણ દિવસ સુધી ભારેથી અતિભારે વરસાદની આગાહી કરવામાં આવી છે.

અમદાવાદ કેન્દ્રના હવામાન વિભાગના નિયામક એ.કે. દાસે જણાવ્યું હતું કે, “મધ્ય મહારાષ્ટ્ર પર ચક્રવાતનું પરિભ્રમણ રચાયું છે. જેના કારણે ગુજરાતમાં વરસાદ પડી રહ્યો છે. ત્રણ દિવસ દરમિયાન રાજ્યના ઘણા ભાગોમાં ભારે વરસાદની શક્યતા છે.”

હવામાન વિભાગ દ્વારા આપવામાં આવેલી માહિતી મુજબ આજે સૌરાષ્ટ્રના ભાવનગર અને દક્ષિણ ગુજરાતના છોટાઉદેપુર, નર્મદા, વલસાડ જિલ્લા અને દમણ અને દાદરાનગર હવેલીમાં ભારેથી અતિભારે વરસાદની આગાહી કરવામાં આવી છે. આ સાથે સૌરાષ્ટ્રના ગીર સોમનાથ અને અમરેલી અને દાહોદ, પંચમહાલ, વડોદરા, ભરૂચ, સુરત, તાપી, ડાંગ, નવસારીમાં ભારે વરસાદની આગાહી કરવામાં આવી છે.