September 18, 2026
ગુજરાતમાં ફરી એકવાર વરસાદી માહોલ જામ્યો છે. હવામાન વિભાગે આગામી સાત દિવસ સુધી વરસાદની આગાહી કરી છે. વિભાગના જણાવ્યા અનુસાર, લો-પ્રેશર (હવાનું હળવું દબાણ) અને સક્રિય ચોમાસુ ટ્રફની અસરને કારણે વિવિધ વિસ્તારોમાં વરસાદી સિસ્ટમની અસર જોવા મળી શકે છે. ખાસ કરીને આજે દ્વારકા, જામનગર, પોરબંદર, જૂનાગઢ અને રાજકોટ જિલ્લામાં ભારે વરસાદની આગાહી કરવામાં આવી છે. આ ઉપરાંત, આગામી ૪૮ કલાક દરમિયાન રાજ્યના કેટલાક ભાગોમાં ગાજવીજ સાથે વરસાદ પડવાની શક્યતા છે.
રાજ્યમાં અત્યાર સુધીમાં વરસાદની ૯% ઘટ
રાજ્યમાં અત્યાર સુધી સામાન્ય કરતાં ૯% ઓછો વરસાદ નોંધાયો છે. જોકે, આગામી દિવસોમાં વરસાદી માહોલ ચાલુ રહેવાની શક્યતા હોવાથી આ ઘટમાં ઘટાડો થઈ શકે છે. ભારે વરસાદની શક્યતા ધરાવતા વિસ્તારોના રહેવાસીઓને સતર્ક રહેવા અને સ્થાનિક સત્તાવાળાઓની સૂચનાઓનું પાલન કરવાની સલાહ આપવામાં આવે છે.
દ્વારકામાં ૪ કલાકમાં ૩ ઇંચ વરસાદ
Trending News
આખરે દ્વારકામાં વરસાદનું આગમન થયું છે. અગાઉ દ્વારકા જિલ્લામાં રાજ્યમાં સૌથી ઓછો વરસાદ નોંધાયો હતો, જેના કારણે ખેડૂતોમાં ચિંતા હતી; જોકે, આજ સવારથી આ વિસ્તારમાં ભારે વરસાદ પડ્યો છે. માત્ર ચાર કલાકમાં ૩ ઇંચ વરસાદ થતાં ખેડૂતોમાં આનંદની લાગણી ફેલાઈ છે. દ્વારકાની મુલાકાતે આવેલા શ્રદ્ધાળુઓએ પૂજા-અર્ચના બાદ વરસાદનો આનંદ માણ્યો હતો. ભારે વરસાદને કારણે ભદ્રકાળી ચોક અને ઇસ્કોન ગેટ સહિતના વિસ્તારોમાં પાણી ભરાઈ ગયા હતા; ખાસ કરીને ઇસ્કોન ગેટ વિસ્તારમાં ઘૂંટણસમા પાણી ભરાયા હતા. દરમિયાન, ઓખા અને મીઠાપુર સહિતના ગામડાઓમાં હળવો વરસાદ પડી રહ્યો છે. દ્વારકા જિલ્લાના ખેડૂતો આશાવાદી છે કે મેઘરાજા પોતાની કૃપા વરસાવતા રહેશે.
જેતપુર શહેર અને તેની આસપાસના વિસ્તારોમાં પણ વરસાદ પડ્યો છે; જેતપુર તાલુકામાં વહેલી સવારથી જ ધીમો અને સતત વરસાદ વરસી રહ્યો છે. તિનબત્તી ચોક, ફૂલવાડી ચોક, બસ સ્ટેન્ડ ચોક, ચાંદની ચોક, એમ.જી. રોડ, મટવા શેરી, અમરનગર રોડ અને જૂનાગઢ રોડ જેવા વિસ્તારોમાં આ હળવો વરસાદ જોવા મળ્યો હતો.
સૌરાષ્ટ્રમાં થયેલા આ વરસાદથી કપાસ, મગફળી, સોયાબીન, એરંડા અને ડુંગળી જેવા પાકોને ફાયદો થવાની અપેક્ષા છે. વરસાદને કારણે ખેડૂતોમાં ખુશીનો માહોલ છે. અત્યાર સુધીમાં જેતપુર તાલુકામાં ૧૮.૪૦ ઇંચ વરસાદ નોંધાયો છે, જે મોસમનાં કુલ વરસાદના ૫૯.૩૫ ટકા જેટલો છે.