September 05, 2026
અલ નીનોની અસરને કારણે, આ સિઝનમાં ગુજરાતમાં સારો વરસાદ થયો નથી. ખાસ કરીને સૌરાષ્ટ્ર અને કચ્છમાં વરસાદની વધુ અછત છે. આ સ્થિતિમાં, 13 સપ્ટેમ્બરે બંગાળની ખાડીમાં એક સિસ્ટમ બનવાની શક્યતા છે. જેના કારણે ગુજરાતમાં વરસાદની આશા છે. જોકે, આ આગાહી અંગે વિવિધ હવામાન મોડેલો એકમત નથી. 13 સપ્ટેમ્બરની આસપાસ બંગાળની ખાડીમાં એક નીચા દબાણનો વિસ્તાર બનશે. જો આ સિસ્ટમ ગુજરાત તરફ આગળ વધે છે, તો 17 સપ્ટેમ્બરથી ગુજરાતમાં વરસાદનો બીજો રાઉન્ડ આવવાની શક્યતા છે. નોંધનીય છે કે આ વર્ષે ગુજરાતમાં સારો અને નોંધપાત્ર વરસાદ થયો નથી કારણ કે બંગાળની ખાડીમાં બનેલી સિસ્ટમ ગુજરાત તરફ આવી ન હતી અને બીજી દિશામાં વળી ગઈ હતી. જો આ સિસ્ટમ ગુજરાત તરફ આવે છે, તો 17 સપ્ટેમ્બરથી ગુજરાતમાં ફરીથી વરસાદી વાતાવરણનો અનુભવ થઈ શકે છે. જોકે, આ લાંબા ગાળાની આગાહી હોવાથી, કોઈ મોડેલ કોઈ સ્પષ્ટ આગાહી કરી રહ્યું નથી. કારણ કે, રાજ્યમાં સપ્ટેમ્બરમાં વરસાદ પડશે કે નહીં તે સિસ્ટમ કેવી રીતે બને છે અને કઈ દિશામાં આગળ વધે છે તેના પર આધાર રાખે છે. જો આ સિસ્ટમ મજબૂત બને અને અરબી સમુદ્રમાંથી આવતા પવનો અનુકૂળ રહે, તો સપ્ટેમ્બરમાં ગુજરાતમાં વરસાદ પડી શકે છે. 17 સપ્ટેમ્બરથી ગુજરાતના કયા ઝોનમાં વરસાદ પડશે તે આ સિસ્ટમની ગતિ પરથી કહી શકાય. જો 13 સપ્ટેમ્બરના રોજ રચાયેલી આ સિસ્ટમ સદનસીબે ગુજરાત તરફ આગળ વધે, તો ગુજરાતમાં સારો વરસાદ થવાની અપેક્ષા છે.
અંબાલાલની આગાહી શું કહે છે?
પ્રખ્યાત હવામાન નિષ્ણાત અંબાલાલ પટેલે 20 સપ્ટેમ્બર સુધી રાજ્યના વિવિધ ભાગોમાં હળવાથી ભારે વરસાદની આગાહી કરી છે. પવનની ગતિ અને બંગાળની ખાડીની સિસ્ટમને કારણે, દક્ષિણ, મધ્ય, સૌરાષ્ટ્ર અને કચ્છના વિસ્તારોમાં વરસાદી સ્થિતિ સર્જાશે, જેનાથી ખેડૂતો અને સામાન્ય લોકોને મોટી રાહત મળશે.
અંબાલાલ પટેલની આગાહી મુજબ, 6 થી 10 સપ્ટેમ્બર દરમિયાન ઉત્તર ગુજરાત, મધ્ય ગુજરાત, પંચમહાલ તેમજ દક્ષિણ ગુજરાત અને સૌરાષ્ટ્રમાં હળવાથી મધ્યમ વરસાદની સંપૂર્ણ શક્યતા છે. પવનની ગતિને કારણે, ક્યાંક એક ઇંચ જેટલો હળવોથી મધ્યમ વરસાદ નોંધાઈ શકે છે. આ ઉપરાંત, 10 સપ્ટેમ્બરની આસપાસ બંગાળની ખાડીમાં ખૂબ જ મજબૂત વરસાદી સિસ્ટમ સક્રિય થવાની સંભાવના છે. જો અલ નીનોની પ્રતિકૂળ અસર નહીં થાય, તો મધ્ય ગુજરાતના વડોદરા અને આણંદ જિલ્લાના કેટલાક ભાગોમાં ભારેથી અતિ ભારે વરસાદ પડી શકે છે, જ્યાં કેટલાક સ્થળોએ 3 ઇંચથી વધુ વરસાદની સંભાવના છે. તેવી જ રીતે દક્ષિણ ગુજરાતના વિસ્તારોમાં 5 ઇંચ કે તેથી વધુ વરસાદ પડી શકે છે. સૌરાષ્ટ્રના દ્વારકા, પોરબંદર અને જામનગર તેમજ કચ્છ અને ગાંધીધામના વિસ્તારોમાં પણ સારા વરસાદના અનુકૂળ સંકેતો છે.
Trending News
એકંદરે, 20 સપ્ટેમ્બર સુધીમાં રાજ્યના ઘણા ભાગોમાં સારા વરસાદની અપેક્ષા છે. આગામી દિવસોમાં આ વરસાદ કૃષિ પાક માટે વરદાન સાબિત થશે અને જળાશયોમાં પાણીનો પ્રવાહ વધશે. હવામાન વિભાગ અને અંબાલાલ પટેલની આ અનુકૂળ આગાહીથી ખેડૂતોમાં ખુશીની લહેર ફેલાઈ ગઈ છે.