June 22, 2026
ચોમાસાના સત્તાવાર પ્રવેશ પહેલા જ ગુજરાતમાં હવામાનમાં મોટો ફેરફાર જોવા મળી રહ્યો છે. હવામાન વિભાગની આગાહી મુજબ, આગામી 7 દિવસ સુધી રાજ્યના વિવિધ ભાગોમાં છૂટાછવાયા વરસાદની શક્યતા છે. રાજ્યના હવામાનમાં આ ફેરફાર વેસ્ટર્ન ડિસ્ટર્બન્સ અને ટ્રફ લાઇનના સક્રિય થવાને કારણે થઈ રહ્યો છે.
ચોમાસાના પ્રવેશ પહેલા જ ગુજરાતમાં હવામાનમાં મોટો ફેરફાર જોવા મળી રહ્યો છે. હાલમાં, વેસ્ટર્ન ડિસ્ટર્બન્સ 5.8 કિમીની ઊંચાઈએ સક્રિય છે, જેનું સ્થાન 72 ડિગ્રી પૂર્વ અને 32 ડિગ્રી ઉત્તરમાં જોવા મળે છે. આ સાથે, ઉત્તર ગુજરાતમાં 5.8 કિમીની ઊંચાઈએ એક ટ્રફ પણ બન્યું છે, જે પશ્ચિમ મધ્ય અરબી સમુદ્ર સુધી વિસ્તરે છે. આ બંને સિસ્ટમ્સની સંયુક્ત અસરને કારણે, આગામી 7 દિવસ સુધી સૌરાષ્ટ્ર, કચ્છ અને ગુજરાતના અન્ય ભાગોમાં છૂટાછવાયા વરસાદી વાતાવરણ રહેશે.
હવામાન વિભાગની આગાહી મુજબ, દક્ષિણ ગુજરાત, સૌરાષ્ટ્ર અને કેટલાક દરિયાકાંઠાના વિસ્તારોમાં હવામાનમાં મોટો ફેરફાર જોવા મળશે. જેમાં સુરત, નવસારી, વલસાડ, તાપી, ડાંગ, નર્મદા, ભાવનગર, બોટાદ, અમરેલી, ગીર સોમનાથ, દીવ, દમણ અને દાદરા અને નગર હવેલીમાં ગાજવીજ સાથે વરસાદની આગાહી કરવામાં આવી છે. પહેલા દિવસે 40-50 કિમી પ્રતિ કલાકની ઝડપે વાવાઝોડાની શક્યતા છે. જેમાં અમરેલી, ભાવનગર, રાજકોટ, સુરેન્દ્રનગર અને કચ્છમાં કેટલાક સ્થળોએ તેમજ બરોડા, સુરત, નવસારી, વલસાડ, દમણ અને દાદરા અને નગર હવેલીમાં ગાજવીજ સાથે વરસાદની શક્યતા છે.
દક્ષિણ પશ્ચિમ ચોમાસું ધીમે ધીમે દેશભરમાં આગળ વધી રહ્યું છે. 23 જૂનની આસપાસ મહારાષ્ટ્ર, તેલંગાણા, ઓડિશા, બિહાર, ઝારખંડ અને છત્તીસગઢના બાકીના ભાગોમાં ચોમાસું પ્રવેશે તેવી પ્રબળ શક્યતા છે. જોકે, આગામી 4-5 દિવસમાં ગુજરાતમાં ચોમાસાના આગમનની કોઈ ચોક્કસ આગાહી નથી. હાલમાં જે વરસાદ પડી રહ્યો છે તે પ્રી-મોન્સૂન એક્ટિવિટી અને સ્થાનિક સિસ્ટમને કારણે છે.
Trending News
આગામી 48 કલાકમાં અરબી સમુદ્રમાં ચોમાસુ સક્રિય થવાની સંભાવના છે. રાજ્યમાં હાલ વરસાદ ચાલુ રહેશે. ઉત્તર ભારતના કેટલાક ભાગોમાં ફૂંકાતા ભારે પવનની અસર રાજસ્થાન અને ઉત્તર ગુજરાતમાં જોવા મળી શકે છે. આગાહી મુજબ, 23 થી 25 જૂન દરમિયાન દક્ષિણ ગુજરાત અને સૌરાષ્ટ્રના વિસ્તારોમાં ચોમાસુ સક્રિય થવાની સંભાવના છે.
નોંધનીય છે કે છેલ્લા 24 કલાકમાં રાજ્યના 9 તાલુકાઓમાં મેધમહેર જોવા મળ્યું છે. જેમાં સૌથી વધુ વરસાદ અમરેલીમાં 1.61 ઇંચ, જ્યારે સૌથી ઓછો થરાદમાં 1 મીમી નોંધાયો છે. નવસારીના ચીખલીમાં 5 મીમી, સુરતના અંબિકામાં 3 મીમી અને નવસારીમાં 1 મીમી વરસાદ પડ્યો છે. નવસારી શહેર અને આસપાસના વિસ્તારોમાં સવારથી જ વાતાવરણમાં પલટો જોવા મળી રહ્યો છે. શહેરના ઇટાલવા અને જમાલપોર વિસ્તારોમાં વરસાદી ઝાપટા પડી રહ્યા છે, જેનાથી વાતાવરણમાં ઠંડક પ્રસરી રહી છે. આ સાથે, વલસાડના ડુંગરી અને આસપાસના વિસ્તારોમાં હળવો વરસાદ પડ્યો છે.