November 14, 2024
ઈરાકમાં છોકરીઓના લગ્નને લઈને નવો કાયદો પ્રસ્તાવિત છે. જો આ કાયદો લાગુ થશે તો અહીંયા 9 વર્ષ પછી છોકરીઓના લગ્ન થઈ શકશે. ઈરાકના આ નવા કાયદાની દુનિયાભરમાં ટીકા થઈ રહી છે. તેમજ મહિલા અધિકાર સમૂહો આને મહિલાઓના અધિકારોનું ઉલ્લંઘન માની રહ્યા છે અને પોતાની નારાજગી વ્યક્ત કરી રહ્યા છે.
છોકરીઓને અનૈતિક સંબંધોથી બચાવવાનો ‘પ્રયાસ’
ધ ટેલિગ્રાફના અહેવાલ મુજબ ઈરાક દેશના લગ્ન કાયદામાં સુધારો કરવાની તૈયારી કરી રહ્યું છે. જો આ સુધારો કરવામાં આવશે તો ઈરાકી પુરુષો માત્ર 9 વર્ષની છોકરીઓ સાથે લગ્ન કરી શકશે. ઇરાકી સંસદ હવે કાયદો 188 બદલવાની તૈયારી કરી રહી છે, જે દેશનો વ્યક્તિગત દરજ્જો કાયદો છે.
આ બિલ નાગરિકોને પારિવારિક બાબતો પર નિર્ણય લેવા માટે ધાર્મિક સત્તાવાળાઓ અથવા નાગરિક ન્યાયતંત્રની પસંદગી કરવાની મંજૂરી આપશે. શિયા પક્ષોની આગેવાની હેઠળની ગઠબંધન સરકાર કહે છે કે સૂચિત સુધારો ઇસ્લામિક શરિયા કાયદાના તેના અર્થઘટનને અનુરૂપ છે. તેનો હેતુ છોકરીઓને ‘અનૈતિક સંબંધો’થી બચાવવાનો છે.
Trending News
છોકરીઓના બળાત્કારને કાયદેસર બનાવવો
આ પ્રસ્તાવને લઈને સમગ્ર વિશ્વમાં ઈરાકની ટીકા થઈ રહી છે. સાથે જ મહિલાઓની કાયદાકીય સુરક્ષાને લઈને પણ ચિંતા વધી રહી છે. થિંક ટેન્ક ચેથમ હાઉસના ડો. રેનાદ મન્સૂરે ચેતવણી આપી હતી કે આ પગલું ધાર્મિક અધિકારને મજબૂત કરવા અને સત્તા પર તેની પકડ મજબૂત કરવા માટે એક વ્યાપક રાજકીય વ્યૂહરચનાનો એક ભાગ છે. જ્યારે આનાથી દેશમાં લિંગ સમાનતા નબળી પડશે અને સાંપ્રદાયિક વિભાજન વધશે.
‘ગથબંધન 188’ જેવા મહિલા અધિકાર જૂથોએ સરકારના આ પગલાને ‘છોકરીઓ પર બળાત્કાર’ને કાયદેસર બનાવવા જેટલું ખતરનાક ગણાવ્યું છે. જો આ કાયદો લાગુ કરવામાં આવશે, તો તે મહિલાઓ સાથે ગેરવર્તણૂકને પ્રોત્સાહન આપશે અને તેમને વધુ નબળા બનાવશે. તે જ સમયે, તે દાયકાઓની સામાજિક પ્રગતિ પર નકારાત્મક અસર કરી શકે છે અને દેશને પછાત તરફ ધકેલશે.