March 20, 2026
રાજ્યના ખેડૂતો હજુ પણ માવઠાના ભયનો સામનો કરી રહ્યા છે. ચક્રવાતી પરિભ્રમણ અને વેસ્ટર્ન ડિસ્ટર્બન્સ સક્રિય થવાને કારણે, આવતીકાલે પણ ગુજરાતના કેટલાક વિસ્તારોમાં કમોસમી વરસાદની સંભાવના છે. કચ્છ, સૌરાષ્ટ્ર, ઉત્તર ગુજરાત, દક્ષિણ ગુજરાત અને મધ્ય ગુજરાતના કેટલાક જિલ્લાઓમાં વરસાદની આગાહી કરવામાં આવી છે.
ગુજરાતમાં વરસાદની સાથે પવનની ગતિ પણ વધુ રહેવાની સંભાવના છે. વાદળછાયા વાતાવરણમાં 30 થી 40 કિલોમીટરની ઝડપે પવન ફૂંકાતા વાવાઝોડા થઈ શકે છે. સૌરાષ્ટ્ર અને કચ્છમાં વરસાદી વાતાવરણ રહેશે. ઘણા જિલ્લાઓમાં કરા સાથે વરસાદ પડી શકે છે.
કચ્છ, જામનગરમાં કરા સાથે વરસાદની આગાહી કરવામાં આવી છે. રાજકોટ, મોરબી, પોરબંદરમાં પણ કરા સાથે વરસાદ પડી શકે છે. જૂનાગઢ, ગીર સોમનાથ, દીવમાં ભારે પવન સાથે વરસાદની આગાહી કરવામાં આવી છે.
હવામાન વિભાગે અમરેલી, બનાસકાંઠા, સાબરકાંઠા, પાટણમાં વરસાદની આગાહી કરી છે. ભારે પવન સાથે વરસાદની શક્યતાને કારણે માછીમારોને દરિયામાં ન જવાની સલાહ આપવામાં આવી છે.
Trending News
બુધવારથી રાજ્યમાં હવામાનમાં પલટો આવ્યો છે. હવામાન વિભાગે 20 માર્ચે પણ વરસાદની આગાહી કરી છે. હવામાન વિભાગે ભારે વરસાદ અને કરા પડવાની ચેતવણી પણ આપી છે. ગુજરાતમાં ભીષણ ગરમી બાદ વરસાદી વાતાવરણ રહેતા તાપમાનમાં ઘટાડો થયો છે.
ગુજરાતમાં હાલમાં બે સિસ્ટમ સક્રિય છે જે વરસાદ લાવી શકે છે. તેમાંથી એક પશ્ચિમ રાજસ્થાન પર ચક્રવાતી પરિભ્રમણ છે. આ સાથે, વેસ્ટર્ન ડિસ્ટર્બન્સ પણ છે. જેના કારણે સૌરાષ્ટ્ર-કચ્છ સહિત સમગ્ર ગુજરાતના કેટલાક છૂટાછવાયા વિસ્તારોમાં વરસાદ પડવાની શક્યતા છે.