September 19, 2024
પાકિસ્તાની મીડિયા ડોનના અહેવાલ મુજબ, પોલેન્ડ અને યુક્રેનની યાત્રા પરથી પરત ફરતી વખતે ભારતીય વડાપ્રધાન નરેન્દ્ર મોદીનું વિમાન 46 મિનિટ સુધી પાકિસ્તાનની એરસ્પેસમાં રહ્યું હતું. જેના કારણે પાકિસ્તાની અધિકારીઓમાં ખળભળાટ મચી ગયો હતો. પાકિસ્તાની મીડિયાએ દાવો કર્યો છે કે કોઈ પણ સદ્ભાવના વિના પીએમ મોદીએ પોલેન્ડ અને યુક્રેનથી પરત ફરતી વખતે પાકિસ્તાનની એરસ્પેસનો ઉપયોગ કર્યો હતો. પોલેન્ડની હાઈ-પ્રોફાઈલ મુલાકાતથી પરત ફરતી વખતે પીએમ મોદીએ પાકિસ્તાની એરસ્પેસ મારફતે અણધારી 46 મિનિટની મુસાફરી કરી હતી.
પાકિસ્તાની મીડિયાના અહેવાલો અનુસાર, પાકિસ્તાનની ઉપર ઉડતી વખતે વડાપ્રધાન મોદીએ શુભેચ્છા સંદેશ આપવાની પરંપરાને પણ અવગણી હતી. તેમના આ નિર્ણયથી બંને પાડોશી દેશો વચ્ચેના વણસેલા સંબંધો અંગે ફરી ચર્ચાઓ શરૂ થઈ ગઈ છે. જો કે, ઉડ્ડયન ઉદ્યોગના સ્ત્રોતે ડૉન સાથે વાત કરતા જણાવ્યું હતું કે સદ્ભાવના સંદેશ એક પરંપરા છે, કોઈ મજબૂરી નથી. સૂત્રએ કહ્યું, “આ સિવાય પીએમ મોદી ભારત પહોંચતાની સાથે જ તેમને તેમના ટીકાકારો તરફથી મુશ્કેલીનો સામનો કરવો પડી શકે છે.
પીએમ મોદીએ ઈસ્લામાબાદ અને લાહોર ઉપર ઉડાન ભરી હતી
પાકિસ્તાનના કેટલાક મીડિયા અહેવાલોએ સિવિલ એવિએશન ઓથોરિટીના સૂત્રોને ટાંકીને જણાવ્યું હતું કે ભારતીય વિમાન ચિત્રાલથી પાકિસ્તાનમાં પ્રવેશ્યું હતું અને અમૃતસરમાં પ્રવેશતા પહેલા ઈસ્લામાબાદ અને લાહોર ઉપરથી ઉડાન ભરી હતી. ઉડ્ડયન ક્ષેત્રના સૂત્રોના જણાવ્યા અનુસાર, પાકિસ્તાની એરસ્પેસ ભારતીય વાણિજ્યિક એર ટ્રાફિક માટે ખુલ્લું હતું. “વડાપ્રધાનના વિમાનને કોઈપણ દેશની ઉપરથી ઉડવા માટે વિશેષ સંમતિની જરૂર નથી અને તેને સંપૂર્ણ પરવાનગી મળે છે. કેટલાક કિસ્સાઓમાં, પીએમના વિમાનને કોલ સાઇન ફાળવવામાં આવે છે, જે રીતે પાકિસ્તાનથી રાજ્યના વડાઓને લઇ જતા વિમાનને ‘પાકિસ્તાન 1’ જેવા કોલ સાઇન ફાળવવામાં આવે છે.
પાકિસ્તાને 2019થી ભારત માટે એરસ્પેસ બંધ કરી દીધી હતી
બાલાકોટમાં ભારતના હવાઈ હુમલા પછી, પાકિસ્તાને 26 ફેબ્રુઆરી, 2019 થી આંતરરાષ્ટ્રીય સરહદ અને એરસ્પેસના ઉલ્લંઘનનો આરોપ લગાવીને તેની એરસ્પેસ સંપૂર્ણપણે બંધ કરી દીધી હતી. પાછળથી માર્ચમાં તેણે તેની એરસ્પેસ આંશિક રીતે ખોલી હતી, પરંતુ તેને ભારતીય ફ્લાઇટ્સ સુધી મર્યાદિત રાખ્યું હતું. પાકિસ્તાને કાશ્મીર વિવાદ પર વધતા તણાવ વચ્ચે તે જ વર્ષે જર્મની માટે તેની એરસ્પેસનો ઉપયોગ કરવાની પીએમ મોદીની વિનંતીને ફગાવી દીધી હતી. બે વર્ષ બાદ પાકિસ્તાને ભારતીય વડાપ્રધાનની નોન-સ્ટોપ ફ્લાઈટને તેની એરસ્પેસ મારફતે અમેરિકા જવાની મંજૂરી આપી.
