November 21, 2024
હવામાન વિભાગે આગામી સપ્તાહમાં રાજ્યમાં વરસાદની આગાહી કરી છે. જેમાં આજે (3 ઓગસ્ટ) દક્ષિણ ગુજરાતના સુરત, નવસારી, વલસાડ, દમણ અને દાદરા નગર હવેલીમાં રેડ એલર્ટ સાથે ભારે વરસાદની આગાહી કરવામાં આવી છે. આ ઉપરાંત રાજ્યના બનાસકાંઠા, સાબરકાંઠા, અરવલ્લી, દાહોદ, મહિસાગર, ખેડા, ભરૂચ, તાપી, અમદાવાદ, આણંદ, વડોદરા, ડાંગ અને છોટાઉદેપુરમાં પણ ભારે વરસાદની આગાહી કરવામાં આવી છે.
આગામી બે દિવસ દક્ષિણ ગુજરાતમાં ભારે વરસાદ
હવામાન વિભાગે દક્ષિણ ગુજરાતમાં 4 ઓગસ્ટે સુરત, નવસારી, વલસાડ, તાપી, દમણ અને દાદરા નગર હવેલીમાં ઓરેન્જ એલર્ટ સાથે ભારે વરસાદની આગાહી પણ કરી છે. તો બનાસકાંઠા, સાબરકાંઠા, અરવલ્લી, દાહોદ, મહિસાગર, નર્મદા, ભરૂચ અને ડાંગમાં વરસાદની આગાહી કરવામાં આવી છે. 5 ઓગસ્ટે સુરત, નવસારી, વલસાડ, ડાંગ, તાપી અને દાદરા નગર હવેલીમાં પણ ભારે વરસાદની આગાહી કરવામાં આવી છે.
ભાવનગરમાં ઓરેન્જ એલર્ટ અને અન્ય જિલ્લાઓમાં યલો એલર્ટ
અમદાવાદમાં આજે ગાજવીજ સાથે ભારે વરસાદની આગાહી કરવામાં આવી છે. તો આજે (3 ઓગસ્ટ) સૌરાષ્ટ્રના ભાવનગરમાં ઓરેન્જ એલર્ટ આપવામાં આવ્યું છે. જ્યારે સૌરાષ્ટ્રના અન્ય જિલ્લાઓ માટે આજે વરસાદના કારણે યલો એલર્ટ જાહેર કરવામાં આવ્યું છે. 4 ઓગસ્ટે સૌરાષ્ટ્રના અમરેલી, ભાવનગર અને ગીર સોમનાથમાં ભારે વરસાદની આગાહી છે.
માછીમારોને આગામી 3 દિવસ દરિયો ન ખેડવાની સૂચના
દરિયાકાંઠાના જિલ્લાઓમાં માછીમારોને આગામી 3 દિવસ સુધી દરિયામાં ન જવા સૂચના આપવામાં આવી છે. આગામી બે દિવસ સમગ્ર રાજ્યમાં ગાજવીજ સાથે વરસાદ પડશે. પવનની ઝડપ 45 કિમી પ્રતિ કલાક અને તેનાથી વધુ રહેશે. દક્ષિણ ગુજરાત અને દક્ષિણ પશ્ચિમ રાજસ્થાનમાં વરસાદી સિસ્ટમ સક્રિય થઈ છે. હવામાન વિભાગના જણાવ્યા અનુસાર, 1 જૂનથી ગુજરાતના ગ્રામ્ય વિસ્તારોમાં 414 મીમી વરસાદ પડ્યો છે. જે સમાન વરસાદ છે. જ્યારે સૌરાષ્ટ્રના ગ્રામ્ય વિસ્તારોમાં 45 ટકાથી વધુ વરસાદ થયો છે.
