February 11, 2026
ખેડૂતો આગામી તા. ૧૩ ફેબ્રુઆરીથી ૦૫ માર્ચ, ૨૦૨૬ સુધી ઈ-ગ્રામ કેન્દ્રો ખાતેથી ઈ-સમૃધ્ધિ પોર્ટલ પર ઓનલાઇન નોંધણી કરાવી શકશે
ચણાની રૂ. ૫,૮૭૫ પ્રતિ કિવ. (રૂ. ૧,૧૭૫ પ્રતિ મણ) અને રાઇની રૂ. ૬,૨૦૦ પ્રતિ ક્વિ. (રૂ. ૧,૨૪૦ પ્રતિ મણ)ના ભાવે ખરીદી કરાશે
કૃષિ મંત્રી શ્રી જીતુભાઈ વાઘાણીએ જણાવ્યું હતું કે રાજ્યના ખેડૂતોને તેમના ઉત્પાદનના પોષણક્ષમ ભાવ તેમજ નાણાકીય સુરક્ષા મળે તે માટે, સરકારે મુખ્યમંત્રી શ્રી ભૂપેન્દ્રભાઈ પટેલના માર્ગદર્શન હેઠળ વર્ષ 2026-27 માટે ટેકાના ભાવે ચણા અને રાઈ ખરીદવાનું આયોજન કર્યું છે.
વધુ માહિતી આપતાં મંત્રીએ જણાવ્યું હતું કે ભારત સરકારના પ્રધાનમંત્રી અન્નદાતા આય સંસાર અભિયાન હેઠળ, ગુજરાતમાં પીએસએસ હેઠળ ટેકાના ભાવે ચણા અને રાઈના પાક ખરીદવામાં આવશે. કુલ વિસ્તાર અને ઉત્પાદનને ધ્યાનમાં રાખીને, ખેડૂતો પાસેથી પૂરતા પ્રમાણમાં ખરીદી કરવામાં આવશે અને આ માટે રાજ્ય સરકાર દ્વારા આગોતરા આયોજન પણ કરવામાં આવશે.
Trending News
કૃષિ મંત્રીએ ઉમેર્યું હતું કે, ટેકાના ભાવે પાક ખરીદવા માટે, રાજ્યના તમામ જિલ્લાઓના ખેડૂતોએ ૧૩ ફેબ્રુઆરીથી ૫ માર્ચ, ૨૦૨૬ દરમિયાન ગ્રામ્ય સ્તરે ઇ-ગ્રામ કેન્દ્રોમાંથી આધાર પ્રમાણીકરણ દ્વારા “ઈ-સમૃદ્ધિ” પોર્ટલ પર નોંધણી કરાવવી પડશે. આ નોંધણી VCE દ્વારા મફતમાં કરવામાં આવશે, જેથી ખેડૂતોને નોંધણી માટે એક પણ રૂપિયો ચૂકવવો નહીં પડે.
કૃષિ મંત્રીએ રાજ્યના જે ખેડૂતો ચણા અને રાઈની ખેતી કરે છે તેમને ટેકાના ભાવે ખરીદી માટે તાત્કાલિક નોંધણી કરાવવા અને આ યોજનાનો મહત્તમ લાભ લેવા વિનંતી કરી છે.
અત્રે ઉલ્લેખનીય છે કે ભારત સરકારે રવિ પાકની વાવણી પહેલાં જ વર્ષ ૨૦૨૬-૨૭ માટે ટેકાના ભાવ જાહેર કર્યા હતા. જે મુજબ, ચણા માટે, પ્રતિ ક્વિન્ટલ રૂ. ૫,૮૭૫ (રૂ. ૧,૧૭૫ પ્રતિ મણ) અને રાઈ માટે, પ્રતિ ક્વિન્ટલ રૂ. ૬,૨૦૦ (રૂ. ૧,૨૪૦ પ્રતિ મણ) જાહેર કરવામાં આવ્યા છે.