March 16, 2026
ગુજરાતમાં હાલમાં પશ્ચિમ-ઉત્તર પશ્ચિમ પવનો ફૂંકાઈ રહ્યા છે. છેલ્લા કેટલાક દિવસોથી ગરમીથી ગુજરાતને આંશિક રાહત મળી રહી છે. આજે સવારે ગુજરાતના કેટલાક વિસ્તારોમાં વાદળછાયું વાતાવરણ રહ્યું. હવામાન વિભાગ દ્વારા આજે બપોરે આપવામાં આવેલી માહિતી મુજબ, ગુજરાતમાં ત્રણ દિવસ સુધી ગાજવીજ સાથે વરસાદની આગાહી કરવામાં આવી છે. ગુરુવારે એટલે કે 19 માર્ચે એક-બે નહીં પરંતુ 26 જિલ્લામાં વરસાદની આગાહી કરવામાં આવી છે.
હવામાન વિભાગના અમદાવાદ કેન્દ્ર દ્વારા આજે આપવામાં આવેલી માહિતી મુજબ, 18 માર્ચ, બુધવારના રોજ કચ્છ, દ્વારકા, મોરબી, જામનગર, બનાસકાંઠા, સાબરકાંઠા અને પાટણ જિલ્લામાં ગાજવીજ સાથે હળવો વરસાદ થવાની સંભાવના છે.
જ્યારે ગુરુવાર, 19 માર્ચે 26 જિલ્લામાં ગાજવીજ સાથે હળવાથી મધ્યમ વરસાદની આગાહી કરવામાં આવી છે. ગુરુવારે કચ્છ, મોરબી, રાજકોટ, સુરેન્દ્રનગર, બોટાદ, અમરેલી, ભાવનગર, ગીર સોમનાથ, પોરબંદર, દ્વારકા, જામનગર, બનાસકાંઠા, સાબરકાંઠા, પાટણ, પંચમહાલ, દાહોદ, વડોદરા, ભરૂચ, સુરત, નર્મદા, તાપી, ડાંગ, છોટાઉદેપુર, નવસારી અને વલસાડ જિલ્લામાં ગાજવીજ અને વીજળી સાથે હળવા વરસાદની આગાહી કરવામાં આવી છે.
હવામાન વિભાગ દ્વારા આપવામાં આવેલી માહિતી મુજબ, 20 માર્ચે કચ્છ, બનાસકાંઠા, સાબરકાંઠા, અરવલ્લી, મહિસાગર અને દાહોદ જિલ્લામાં ગાજવીજ અને વીજળી સાથે હળવો વરસાદ થવાની આગાહી કરવામાં આવી છે. તેનો અર્થ એ કે રાજ્યના લગભગ મોટાભાગના જિલ્લાઓમાં ગાજવીજ અને વીજળી પડવાનું જોખમ છે.
Trending News
હવામાન નિષ્ણાત અંબાલાલ પટેલે ગુજરાત માટે તેમની હવામાન આગાહીમાં જણાવ્યું છે કે ઉત્તર ગુજરાત, મધ્ય ગુજરાત, પશ્ચિમ સૌરાષ્ટ્ર, દક્ષિણ ગુજરાતના છૂટાછવાયા સ્થળોએ વરસાદની શક્યતા છે. આ સાથે પવનની ગતિ વધવાની પણ આગાહી છે. હવામાનમાં ફેરફારને કારણે કેરીના મોર ખરી પડવાની શક્યતા છે. અંબાલાલ પટેલે વધુમાં જણાવ્યું છે કે ૧૮મી તારીખ પહેલા કચ્છથી ઉત્તર ગુજરાતના કેટલાક ભાગોમાં વેસ્ટર્ન ડિસ્ટર્બન્સની અસર જોવા મળશે. કરા પડવાની શક્યતા રહેશે અને પવનની ગતિ પણ રહેશે. ૨૬ થી ૨૯ માર્ચ સુધી હવામાનમાં પણ ફેરફાર થશે. આ સાથે એપ્રિલ મહિનામાં પણ હવામાનમાં ફેરફાર ચાલુ રહેશે. તેથી, એક પછી એક વેસ્ટર્ન ડિસ્ટર્બન્સ આવવાને કારણે, રાજ્ય સહિત દેશના કેટલાક ભાગોમાં વરસાદની શક્યતા રહેશે અને પ્રિમોન્સૂન એક્ટિવિટી ધીમે ધીમે શરૂ થશે.