October 29, 2026
ગુજરાતના હવામાન નિષ્ણાત અંબાલાલ પટેલે રાજ્યમાં આગામી સમયમાં થનારા હવામાન ફેરફારો અંગે મહત્વની આગાહી કરી છે. બંગાળની ખાડીમાં સર્જાતી હવામાન પ્રણાલીઓ અને ‘વેસ્ટર્ન ડિસ્ટર્બન્સ’ (પશ્ચિમી વિક્ષેપ) ની અસર ગુજરાત સહિત દેશના અન્ય ભાગોમાં જોવા મળી શકે છે. આના કારણે તહેવારોની મોસમ દરમિયાન કમોસમી વરસાદ પડી શકે છે અને ઠંડીના પ્રમાણમાં વધઘટ થઈ શકે છે.
અંબાલાલ પટેલની આગાહી મુજબ, બંગાળની ખાડીમાં સર્જાયેલું શક્તિશાળી ચક્રવાત ‘અર્નાબ’ (Arnab) ઓડિશા અને આંધ્રપ્રદેશના કિનારે ત્રાટક્યા બાદ નબળું પડીને ‘ડીપ ડિપ્રેશનમાં’ ફેરવાઈ ગયું છે અને હાલમાં તે જમીન વિસ્તારમાં આગળ વધી રહ્યું છે. આ પ્રણાલીની અસર પૂર્વી મધ્યપ્રદેશ તેમજ ગુજરાતના કેટલાક ભાગોમાં જોવા મળી શકે છે.
ગુજરાતમાં કમોસમી વરસાદની આગાહી
આજથી સમગ્ર ગુજરાતમાં પવનની ગતિમાં વધારો થવાની શક્યતા છે. ૩૦ ઓક્ટોબરથી ૩ નવેમ્બરની વચ્ચે રાજ્યના વિવિધ વિસ્તારોમાં કમોસમી વરસાદ અથવા છૂટાછવાયા ઝાપટાં પડી શકે છે. પંચમહાલ અને છોટા ઉદેપુર જેવા વિસ્તારોમાં હળવો વરસાદ થઈ શકે છે, જ્યારે વલસાડ, નવસારી અને સુરતમાં કમોસમી વરસાદની શક્યતા છે. તેવી જ રીતે, અમરેલી, ભાવનગર અને જૂનાગઢમાં પણ વરસાદી વાતાવરણ જોવા મળી શકે છે. આ ઉપરાંત, સાબરકાંઠા, અરવલ્લી અને કચ્છના કેટલાક ભાગોમાં પણ હળવો વરસાદ કે છૂટાછવાયા ઝાપટાં પડી શકે છે. કેટલાક વિસ્તારોમાં આ વરસાદ સાથે ગાજવીજ પણ થઈ શકે છે. વધુ એક શક્તિશાળી ચક્રવાતની શક્યતા
ગુજરાતમાં આગામી હવામાન ફેરફારો અંગે વાત કરતા અંબાલાલ પટેલે જણાવ્યું હતું કે, નવેમ્બર અને ડિસેમ્બરની શરૂઆતમાં બંગાળની ખાડીમાં વધુ એક શક્તિશાળી ચક્રવાત અથવા લો-પ્રેશર સિસ્ટમ (હવાનું હળવું દબાણ) સર્જાવાની શક્યતા છે. નવેમ્બરના પ્રથમ પખવાડિયામાં, ખાસ કરીને ૧૨ થી ૧૪ નવેમ્બરની આસપાસ રાજ્યમાં કમોસમી વરસાદ જેવી સ્થિતિ સર્જાઈ શકે છે. વધુમાં, એવી આગાહી કરવામાં આવી છે કે ૧૮ નવેમ્બરથી ડિસેમ્બરની વચ્ચે બંગાળની ખાડીમાં ફરી એક શક્તિશાળી ચક્રવાત રચાઈ શકે છે.
દિવાળી અને નવા વર્ષ દરમિયાન ગુજરાતમાં હવામાન કેવું રહેશે?
તહેવારોના સમયગાળા દરમિયાન હવામાનની પેટર્નમાં ફેરફાર થઈ શકે છે. દિવાળી દરમિયાન આકાશ વાદળછાયું રહી શકે છે, જોકે વરસાદ પડવાની શક્યતા ઓછી છે. નવા વર્ષની શરૂઆતમાં કેટલાક વિસ્તારોમાં વાદળછાયું વાતાવરણ જોવા મળી શકે છે. ઉત્તર ભારતમાં ‘વેસ્ટર્ન ડિસ્ટર્બન્સ’ (પશ્ચિમી વિક્ષેપ)ને કારણે ત્યાં તાપમાનમાં ઘટાડો થવાની શક્યતા છે; જેના પરિણામે ગુજરાતમાં પણ હળવી અને ખુશનુમા ઠંડીની શરૂઆત થઈ શકે છે.
Trending News
ખેતી અને રવિ પાક પર તેની શું અસર પડશે?
નવેમ્બર દરમિયાન હવામાનમાં થયેલો આ ફેરફાર ખેડૂતોની ચિંતા વધારી શકે છે. ઉત્તર ગુજરાતમાં ઘઉં અને અન્ય રવિ પાકોના વાવેતરની મોસમ શરૂ થવાની તૈયારીમાં છે, ત્યારે હવામાનમાં થતા આ બદલાવની નોંધપાત્ર અસર પડવાની શક્યતા છે. હવામાનની બદલાતી પરિસ્થિતિ ઘઉંના પાક પર મધ્યમ અસર કરી શકે છે. ડિસેમ્બરના અંતમાં આવતું ‘વેસ્ટર્ન ડિસ્ટર્બન્સ’ રવિ પાક માટે ફાયદાકારક સાબિત થઈ શકે છે; જોકે, ફેબ્રુઆરી મહિનામાં તાપમાન અને ઠંડીની સ્થિતિ ઘઉંના દાણાની ગુણવત્તાને અસર કરી શકે છે.
હવામાન નિષ્ણાતોની ખેડૂતોને સલાહ
હવામાન નિષ્ણાતોએ ખેડૂતોને સતત બદલાતા હવામાન પર ચાંપતી નજર રાખવા અને પાકને બચાવવા માટે યોગ્ય અગાઉથી પગલાં લેવાની સલાહ આપી છે. આગામી હવામાન પરિસ્થિતિ જીરું અને કઠોળના પાક માટે ખૂબ મહત્વપૂર્ણ રહેશે. વધુમાં, માર્ચ અને એપ્રિલ મહિના દરમિયાન કમોસમી વરસાદ થવાની શક્યતાને પણ નકારી શકાય તેમ નથી. ફેબ્રુઆરીના ઉત્તરાર્ધમાં ઉનાળુ પાકોનું વાવેતર શરૂ થવાની અપેક્ષા છે.