August 07, 2026
છેલ્લા કેટલાક દિવસોથી ગુજરાતમાં મેઘરાજાએ વિરામ લીધો છે. જોકે, હવે વરસાદી સિસ્ટમ ફરી સક્રિય થઈ છે, અને રાજ્યમાં ફરી એકવાર વરસાદી વાતાવરણનો અનુભવ થશે. હવામાન વિભાગે આગામી દિવસોમાં વરસાદની તીવ્રતા વધવાની શક્યતા વ્યક્ત કરી છે. બીજી તરફ, હવામાન નિષ્ણાત અંબાલાલ પટેલે પણ ગુજરાતમાં વરસાદનો બીજો રાઉન્ડ આવવાની આગાહી કરી છે. તો નવી આગાહી શું છે અને મેઘરાજાના નવા રાઉન્ડ ક્યારે શરૂ થશે, ચાલો જાણીએ.
ગુજરાતમાં વરસાદનો નવો રાઉન્ડ શરૂ થવાનો છે. હવામાન વિભાગે આગામી શનિવાર અને રવિવારે ભારે વરસાદ માટે યલો એલર્ટ જારી કર્યું છે. હવામાન વિભાગે અમદાવાદ, વડોદરા, સુરત, રાજકોટ અને ભાવનગરમાં 40 કિલોમીટર પ્રતિ કલાકની ઝડપે પવન ફૂંકાય તેવી શક્યતા વ્યક્ત કરી છે. રવિવાર અને સોમવારે પણ ઘણા જિલ્લાઓમાં વરસાદી વાતાવરણ ચાલુ રહેશે.
ગુજરાતમાં ફરી એકવાર ચોમાસુ સક્રિય થયું છે. હવામાન વિભાગના જણાવ્યા અનુસાર, વેસ્ટર્ન ડિસ્ટર્બન્સ અને મોનસુન ટ્રફ સક્રિય થવાને કારણે, દક્ષિણ-પશ્ચિમ ભેજવાળા પવનો રાજ્યભરમાં વરસાદી સ્થિતિનું નિર્માણ કરશે. હવામાન વિભાગે આગામી 3 દિવસ દરમિયાન રાજ્યમાં વાવાઝોડાની આગાહી કરી છે. ખાસ કરીને 8 અને 9 ઓગસ્ટના રોજ ઉત્તર ગુજરાતના વિવિધ વિસ્તારોમાં ભારેથી અતિ ભારે વરસાદ પડી શકે છે.
હવામાન વિભાગની સત્તાવાર આગાહી મુજબ, 8 ઓગસ્ટના રોજ સાબરકાંઠા અને અરવલ્લી જિલ્લામાં કેટલાક સ્થળોએ ભારે વરસાદની સંભાવના છે. જ્યારે 9 ઓગસ્ટના રોજ બનાસકાંઠા, વાવ-થરાદ, સાબરકાંઠા અને અરવલ્લી જિલ્લામાં ભારે વરસાદની ચેતવણી આપવામાં આવી છે. ઉત્તર ગુજરાતના આ વિસ્તારો ઉપરાંત પાટણ અને મહેસાણામાં પણ વાદળો જોવા મળશે.
Trending News
હવામાન નિષ્ણાત અંબાલાલ પટેલે આજથી રાજ્યમાં ફરી એક રાઉન્ડ વરસાદની આગાહી કરી છે. અંબાલાલ પટેલની આગાહી મુજબ, આજથી 11 ઓગસ્ટ સુધી સાબરકાંઠા, અરવલ્લી અને પંચમહાલમાં ત્રણ ઇંચ કે તેથી વધુ વરસાદની શક્યતા છે. અમદાવાદ, ગાંધીનગર, વડોદરા, વાવ, થરાદ, બનાસકાંઠા, કચ્છ, દક્ષિણ ગુજરાત અને પશ્ચિમ સૌરાષ્ટ્રના કેટલાક ભાગોમાં પણ વરસાદની શક્યતા છે. રાજ્યમાં પવનની ગતિ વધુ રહી શકે છે. ૧૭-૧૮ ઓગસ્ટે માઘ નક્ષત્રમાં અને ૨૩ ઓગસ્ટ પછી સારા વરસાદની શક્યતા દર્શાવવામાં આવી છે.