July 30, 2026
ગુજરાતમાં હજુ પણ મેઘરાજા વરસાદના મૂડમાં છે. પ્રખ્યાત હવામાન નિષ્ણાત અંબાલાલ પટેલે આગામી દિવસોમાં રાજ્યમાં વરસાદ અંગે મોટી આગાહી કરી છે. તેમની આગાહી મુજબ, 30 જુલાઈથી રાજ્યના તમામ ઝોનમાં ફરી એકવાર વરસાદનું જોર વધશે અને 3 થી 20 ઇંચ સુધી વરસાદ પડી શકે છે. ખાસ કરીને દક્ષિણ ગુજરાત અને સૌરાષ્ટ્રમાં, વધુ મેઘમહેર થવાની સંભાવના છે, અને ઓગસ્ટ મહિનામાં પણ એક નવી સિસ્ટમ રચાય તેવી સ્પષ્ટ શક્યતા છે.
અંબાલાલ પટેલના જણાવ્યા મુજબ, આગામી 48 કલાક દરમિયાન રાજ્યના વિવિધ જિલ્લાઓમાં ભારે વરસાદ પડવાની સંભાવના છે. તે પછી, એટલે કે 30 જુલાઈથી, વરસાદનું જોર અચાનક વધશે. તેની પાછળનું મુખ્ય કારણ એ છે કે એક સાથે 5 જેટલી વરસાદી સિસ્ટમ સક્રિય થઈ રહી છે. આ સિસ્ટમ્સની અસરને કારણે, ૩૦ જુલાઈથી ૩ ઓગસ્ટ દરમિયાન સમગ્ર ગુજરાતમાં ભારેથી અતિ ભારે વરસાદ પડવાની શક્યતા છે.
તેમણે વધુમાં સ્પષ્ટતા કરી છે કે રાજ્યમાં એક પણ ઝોન એવો નહીં હોય જ્યાં વરસાદની અસર જોવા ન મળે. બધા ઝોનમાં વરસાદની આગાહી કરવામાં આવી છે અને કેટલાક જિલ્લાઓમાં પરિસ્થિતિ એટલી ગંભીર બની શકે છે કે ત્યાં ૩ થી ૨૦ ઇંચ વરસાદ નોંધાઈ શકે છે. જો આપણે વિવિધ વિસ્તારોની વાત કરીએ તો, દક્ષિણ ગુજરાતના કેટલાક ભાગોમાં ખૂબ જ ભારે વરસાદ પડવાની શક્યતા છે, જ્યારે સૌરાષ્ટ્ર પંથકમાં ભારે વરસાદ પડવાની સંપૂર્ણ શક્યતા છે.
વરસાદનો આ રાઉન્ડ ફક્ત ઓગસ્ટની શરૂઆતમાં જ સમાપ્ત થતો નથી. અંબાલાલ પટેલની આગાહી મુજબ, 8 ઓગસ્ટે બંગાળની ખાડીમાં બીજી એક નવી વરસાદી સિસ્ટમ આકાર લેશે. આ નવી સિસ્ટમ સક્રિય થવાને કારણે, વરસાદી વાતાવરણ ફરી શરૂ થશે અને પરિણામે, 5 ઓગસ્ટથી 14 ઓગસ્ટ દરમિયાન દક્ષિણ ગુજરાતમાં ફરીથી ભારેથી અતિ ભારે વરસાદ પડી શકે છે.
Trending News
હવામાન વિભાગની આગાહી
ડીપ ડિપ્રેશન, મોનસુન ટ્રફ, અપર એર સાયક્લોનિક સર્ક્યુલેશન અને વેસ્ટર્ન ડિસ્ટર્બન્સ સક્રિય થવાને કારણે હવામાન વિભાગે 30 જુલાઈથી રાજ્યમાં ભારે વરસાદની આગાહી કરી છે. આજે, હવામાન વિભાગે ચાર જિલ્લામાં વરસાદ માટે યલો એલર્ટ જારી કર્યું છે. તો, 30 અને 31 જુલાઈએ દક્ષિણ ગુજરાતમાં ભારેથી અતિ ભારે વરસાદની આગાહી કરવામાં આવી છે. 30 જુલાઈએ, નર્મદા, તાપી અને ડાંગ જિલ્લાઓ માટે ઓરેન્જ એલર્ટ જારી કરવામાં આવ્યું છે. જ્યારે હવામાન વિભાગે મધ્ય ગુજરાતમાં વડોદરા, છોટા ઉદેપુર સાથે દક્ષિણ ગુજરાતના ભરૂચ, સુરત, નવસારી, વલસાડ જિલ્લાઓ માટે યલો એલર્ટ જારી કર્યું છે. કેન્દ્રશાસિત પ્રદેશ દમણ અને દાદરા નગર હવેલીમાં પણ વરસાદ માટે યલો એલર્ટ જારી કરવામાં આવ્યું છે. 31 જુલાઈના રોજ, ભારે વરસાદની આગાહીને પગલે નર્મદા અને છોટા ઉદેપુર જિલ્લામાં રેડ એલર્ટ જારી કરવામાં આવ્યું છે. જ્યારે 10 જિલ્લામાં ઓરેન્જ એલર્ટ અને 9 જિલ્લામાં યલો એલર્ટ જારી કરવામાં આવ્યું છે. ભારે વરસાદની આગાહીને પગલે માછીમારોને પણ સાવચેત રહેવા અપીલ કરવામાં આવી છે.