December 01, 2025
ગુજરાતના ઘણા વિસ્તારોમાં ભારેથી અતિ ભારે વરસાદની આગાહી કરવામાં આવી છે. હવામાન વિભાગે માછીમારોને દરિયામાં ન જવાની સલાહ આપી છે. હવામાન વિભાગે આપેલી માહિતી મુજબ, દક્ષિણ આંતરિક ઓડિશા પર બનેલું ડિપ્રેશન પશ્ચિમ તરફ આગળ વધી રહ્યું છે. તે ધીમે ધીમે નબળું પડી ગયું છે અને ઓછા દબાણવાળા ક્ષેત્રમાં ફેરવાઈ ગયું છે. જેના કારણે દક્ષિણ ગુજરાત અને સૌરાષ્ટ્રના કેટલાક વિસ્તારોમાં ભારેથી અતિ ભારે વરસાદની આગાહી કરવામાં આવી છે. બીજી તરફ, રવિવારે સાંજે ત્રણ કલાકની આગાહી બહાર પાડવામાં આવી છે. આજે 7 થી 10 કલાકની આગાહીમાં રાજ્યના 7 જિલ્લાઓમાં રેડ એલર્ટ આપવામાં આવ્યું છે.
હવામાન વિભાગની નાઉ કાસ્ટ આગાહી મુજબ, રવિવારે સાંજે 7 થી 10 કલાકની આગાહીમાં રાજ્યના 7 જિલ્લાઓમાં રેડ એલર્ટ આપવામાં આવ્યું છે. ભરૂચ, ભાવનગર, દાહોદ, પંચમહાલ, ખેડા, મહેસાણા, પાટણમાં વરસાદનું રેડ એલર્ટ આપવામાં આવ્યું છે. આ સાત જિલ્લાઓમાં ત્રણ કલાક સુધી ભારે વરસાદની આગાહી કરવામાં આવી છે. જ્યારે ગાજવીજ સાથે પવનની ગતિ 41 થી 61 કિલોમીટર રહેવાની શક્યતા છે.
બીજી તરફ રાજ્યના મોટાભાગના જિલ્લાઓમાં વરસાદ માટે ઓરેન્જ એલર્ટ છે. વલસાડ, નવસારી, સુરત, વાપી, ડાંગ, તાપી, નર્મદા, છોટા ઉદેપુર, વડોદરા, આણંદ, મહિસાગર, અરવલ્લી, બનાસકાંઠા, સાબરકાંઠા, અમદાવાદ, સુરેન્દ્રનગર, બોટાદ, અમરેલી, ગીર સોમનાથમાં વરસાદ માટે ઓરેન્જ એલર્ટ છે. જ્યાં મધ્યમ વરસાદની આગાહી કરવામાં આવી છે.
જ્યારે રાજ્યના 7 જિલ્લામાં વરસાદ માટે યલો એલર્ટ છે. કચ્છ, મોરબી, જામનગર, રાજકોટ, જૂનાગઢ, પોરબંદર, દેવભૂમિ દ્વારકામાં હળવા વરસાદની આગાહી કરવામાં આવી છે.
