December 01, 2025
ગુજરાતમાં હજુ 48 કલાક વરસાદ ચાલુ રહેશે તેવું લાગે છે. હવામાન વિભાગે 21 અને 22 ઓગસ્ટના રોજ ભારેથી અતિ ભારે વરસાદની આગાહી કરી છે. ત્યારે, આગામી સાત દિવસ ગુજરાતમાં કેટલો વરસાદ પડશે તેની હવામાન વિભાગની આગાહી જોઈએ. ઉલ્લેખનીય છે કે સાર્વત્રિક વરસાદના પરિણામે, રાજ્યની જીવાદોરી સમાન સરદાર સરોવર ડેમ 79.37 ટકા ભરાઈ ગયો છે. સરદાર સરોવર સિવાય, રાજ્યના કુલ 206 ડેમમાંથી 55 ડેમ 100 ટકા ભરાઈ ગયા છે. જ્યારે 66 ડેમ 70 થી 100 ટકા ભરાઈ ગયા છે, 36 ડેમ 50 થી 70 ટકા ભરાઈ ગયા છે, 30 ડેમ 25 ટકાથી 50 ટકા ભરાઈ ગયા છે અને 19 ડેમ 25 ટકાથી ઓછા ભરાઈ ગયા છે. હાલમાં, રાજ્યમાં 70 ડેમ હાઇ એલર્ટ પર છે, 35 ડેમ એલર્ટ પર છે અને 16 ડેમ વોર્નિંગ એલર્ટ પર છે.
આજે કચ્છ, સાબરકાંઠા, અરવલ્લી, મહિસાગરમાં ઓરેન્જ એલર્ટ સાથે ભારે વરસાદની આગાહી કરવામાં આવી છે. આ ઉપરાંત દ્વારકા, જામનગર, મોરબી, સુરેન્દ્રનગર, અમદાવાદ, ગાંધીનગર, બનાસકાંઠા, પાટણ, મહેસાણા, ખેડા, પંચમહાલ, દાહોદ, તાપી, નવસારી, ડાંગ, વલસાડમાં યલો એલર્ટ સાથે ભારે વરસાદની આગાહી કરવામાં આવી છે.
22મીએ કચ્છ, સાબરકાંઠા, અરવલ્લી, મહિસાગરમાં ઓરેન્જ એલર્ટ સાથે ભારે વરસાદની આગાહી કરવામાં આવી છે. આ ઉપરાંત મોરબી, સુરેન્દ્રનગર, ગાંધીનગર, બનાસકાંઠા, પાટણ, મહેસાણા, ખેડા, પંચમહાલ, દાહોદ, ભરૂચ, સુરત, તાપી, નવસારી, ડાંગ, વલસાડમાં યલો એલર્ટ સાથે ભારે વરસાદની આગાહી કરવામાં આવી છે. અન્ય તમામ જિલ્લાઓમાં કોઈ ચેતવણી આપવામાં આવી નથી.
23મીએ ભારે વરસાદ સાથે બનાસકાંઠા, સાબરકાંઠા, અમરેલી, ભાવનગર માટે ઓરેન્જ એલર્ટ જાહેર કરવામાં આવ્યું છે. આ સાથે કચ્છ, બોટાદ, ગીરસોમનાથ, ગાંધીનગર, અમદાવાદ, પાટણ, મહેસાણા, ખેડા, અરવલ્લી, મહિસાગર, ભરૂચ, સુરત, તાપી, નવસારી, ડાંગ, વલસાડમાં ભારે વરસાદ સાથે યલો એલર્ટ જાહેર કરવામાં આવ્યું છે. અન્ય તમામ જિલ્લાઓમાં કોઈ ચેતવણી આપવામાં આવી નથી.
