સૌરાષ્ટ્રના આ બે જિલ્લામાં આભ ફાટ્યું, ભાવનગર અને બોટાદમાં બારે મેઘ ખાંગા, અનેક વિસ્તારો જળબંબાકાર

ભાવનગર જિલ્લામાં સતત ભારે વરસાદ પડી રહ્યો છે, જેના કારણે સામાન્ય જનજીવન પર અસર પડી છે. બોટાદમાં બીજા દિવસે પણ ભારે વરસાદ પડ્યો છે, જેના પરિણામે ઘણા રસ્તાઓ પાણીમાં ડૂબી ગયા છે અને કેટલાક ગામો સંપર્કવિહોણા બની ગયા છે.

આ ભારે વરસાદ વચ્ચે બોટાદના લાઠીદરથી એક ચિંતાજનક ઘટના સામે આવી છે. પ્રાપ્ત માહિતી અનુસાર, ચૌહાણ પરિવારની એક ઇકો કાર નદીમાં ખેંચાઈ ગઈ હતી. આ ઘટનામાં કુલ 6 લોકો ગુમ થયા હતા, જેમાંથી 2 લોકોને બચાવી લેવામાં આવ્યા છે, જ્યારે અન્ય 4 લોકો હજુ પણ ગુમ છે અને તેમની શોધ ચાલુ છે.

ગઈકાલે ચોમાસાની શરૂઆતથી જ ભાવનગર અને અમરેલી જિલ્લામાં મેઘરાજાએ પોતાનું ઉગ્ર સ્વરૂપ બતાવ્યું છે. પાલિતાણા અને સિહોર જેવા વિસ્તારો પાણીમાં ગરકાવ થઈ ગયા છે. ઘણી જગ્યાએ લોકો ફસાયા હોવાના બનાવો પણ બન્યા છે, જેના કારણે તેમને બચાવવા માટે બચાવ કામગીરી હાથ ધરવી પડી છે. આ વરસાદી પરિસ્થિતિને ધ્યાનમાં રાખીને, સ્થાનિક વહીવટીતંત્રે લોકોને સાવચેત રહેવા અને નદીઓ અને નાળાઓ નજીક ન જવાની અપીલ કરી છે. નીચાણવાળા વિસ્તારોમાં રહેતા લોકોને પણ સલામત સ્થળોએ જવાની સૂચના આપવામાં આવી છે.