November 21, 2024
બંદર સેરી બેગવાનઃ ભારતના વડાપ્રધાન નરેન્દ્ર મોદી હાલમાં બ્રુનેઈની બે દિવસીય મુલાકાતે છે. તેમની મુલાકાત દરમિયાન નરેન્દ્ર મોદીએ બ્રુનેઈના શાસક સુલતાન હસનલ બોલ્કિયા સાથે તેમના સત્તાવાર નિવાસસ્થાન ઈસ્તાના નુરુલ ઈમાન પેલેસમાં મુલાકાત કરી હતી. બ્રુનેઈની રાજધાની બંદર સેરી બેગવાનમાં બનેલ ઈસ્તાના નુરુલ ઈમાન પેલેસને દુનિયાનો સૌથી ભવ્ય મહેલ કહેવામાં આવે છે. તેનું નામ તેની ભવ્યતા માટે ગિનિસ વર્લ્ડ રેકોર્ડમાં નોંધાયેલું છે. આ મહેલની ભવ્યતાનો અંદાજ એ વાત પરથી લગાવી શકાય છે કે તેમાં 1,788 રૂમ, 257 બાથરૂમ અને 38 વિવિધ પ્રકારના માર્બલથી બનેલી 44 સીડીઓ છે.
એનડીટીવીના અહેવાલ મુજબ, ઇસ્તાના નુરુલ ઈમાન (આસ્થાના પ્રકાશનો મહેલ) 80ના દાયકાની શરૂઆતમાં સુલતાન હસનલે બનાવ્યો હતો. આશરે $1.4 બિલિયનના ખર્ચે બાંધવામાં આવેલ આ મહેલ 1984માં બ્રિટિશ શાસનથી બ્રુનેઈની સ્વતંત્રતા પહેલા જ પૂર્ણ થયો હતો. આ મહેલને ફિલિપિનો આર્કિટેક્ટ લિયોનાર્ડો લોક્સિન દ્વારા ડિઝાઇન કરવામાં આવ્યો હતો, જેનો હેતુ આઝાદી પછી દેશ માટે નવા યુગનું પ્રદર્શન કરવાનો હતો.
મહેલમાં શું ખાસ છે
બ્રુનેઈ સુલતાનનો આ મહેલ લગભગ 2,00,000 ચોરસ મીટરમાં બનેલો છે, આ કદ તેને વિશ્વની સૌથી મોટી રહેણાંક ઇમારત બનાવે છે. 257 બાથરૂમ અને 1,788 રૂમ ઉપરાંત, તે એક સમયે 5,000 મહેમાનોને હોસ્ટ કરી શકે તેટલો મોટો બેન્ક્વેટ હોલ ધરાવે છે. આ પેલેસના પાર્કિંગમાં 110 કાર પાર્ક કરી શકાય છે. 200 ઘોડાઓ માટે એક વાતાનુકૂલિત સ્ટેબલ, પાંચ સ્વિમિંગ પુલ અને એક ભવ્ય મસ્જિદ પણ મહેલની અંદર છે. આ મસ્જિદમાં એક સાથે 1,500 લોકો નમાઝ અદા કરી શકે છે.
મહેલની આર્કિટેક્ચરલ ડિઝાઇન બ્રુનેઇની ઇસ્લામિક સંસ્કૃતિ અને મલય પરંપરાઓનું મિશ્રણ છે. મહેલના બહારના ભાગમાં ગોલ્ડન ડોમ બનાવવામાં આવ્યા છે. ગુંબજમાં 22 કેરેટ સોનાથી જડાયેલો કેન્દ્રીય ગુંબજ પણ સામેલ છે. તે ખુઆન ચ્યુ દ્વારા ડિઝાઇન કરવામાં આવ્યું છે, જેમણે દુબઇના બુર્જ અલ અરબને ડિઝાઇન કરવામાં પણ મદદ કરી હતી. આ મહેલમાં ઘણા મોટા કાર્યક્રમોનું આયોજન કરવામાં આવે છે. આ મહેલમાં 28મી એશિયા-પેસિફિક ઇકોનોમિક કોઓપરેશન (APEC) આર્થિક નેતાઓની બેઠક યોજાઇ હતી. ઇસ્તાના નુરુલ ઇમાન વિશ્વનો સૌથી મોટો રહેણાંક મહેલ છે, પરંતુ તે સૌથી મોંઘો નથી. એટલે કે કિંમતની દ્રષ્ટિએ તેનાથી પણ મોંઘો બકિંગહામ પેલેસ છે, જે લંડનના શાહી પરિવારનું ઘર છે. બકિંગહામ પેલેસની કિંમત લગભગ $2.9 બિલિયન છે.
Trending News
પીએમ મોદીએ સંબંધોમાં સુધારાની આશા વ્યક્ત કરી હતી
પીએમ મોદીએ બ્રુનેઈમાં કહ્યું કે બંને દેશો વચ્ચેના સંબંધો સદીઓ જૂના છે અને આ સંબંધો સાંસ્કૃતિક પણ છે. તેમણે કહ્યું કે તેઓ ખુશ છે કે તેઓ બ્રુનેઈની આઝાદીની 40મી વર્ષગાંઠ પર અહીં આવ્યા છે. બ્રુનેઈને ભારતની લુક ઈસ્ટ પોલિસીનો એક મહત્વપૂર્ણ ભાગ ગણાવતા પીએમ મોદીએ કહ્યું કે તેમની આ મુલાકાતથી ચોક્કસપણે બંને દેશો વચ્ચેના સંબંધો સુધરશે. આ દરમિયાન પીએમ મોદીએ 2018માં બ્રુનેઈ સુલતાનની મુલાકાતને પણ યાદ કરી અને તેમનો આભાર માન્યો.